Nov 5, 2021
ვამბობ, რომ ასეთი განსვლა თეორიისა და პრაქტიკის, როგორც მოზარდთან ურთიერთობისას გვხვდება, სხვაგან არამგონია იყოს.
ჰოდა, ხერხები როგორ გავაუარესოთ უერთიერთობა მათთან (აი უკუღმა რომ ესმით ყველაფერი ეგ პათოსია აქაც ხაზგასმული). თქვენ თუ გაუმჯობესება გინდათ, შესაბამისად პირიქით უნდა მოიქცეთ.
მაშ ასე:
-არ მოუსმინოთ!
რა საჭიროა, ჯერ ხომ არაფერი იციან, მთავარი ხომ უფროსია, ჰოდა ჩვენ უნდა ვილაპარაკოთ. ისინი კი უხეშად გავაჩუმოთ. ან რო ილაპარაკონ რას იტყვიან რო ღირებულს?
-არ ავუხსნათ!
ვაიძულოთ უსიტყვოდ შეასრულონ ჩვენი მითითება. ვასწავლოთ მორჩილება, რა აუცილებელია უფროსს შეეკამათოს? მთავარი ზრდილობაა. ჰოდა იცოდნენ, ზრდასრულმა სიტყვა დოგმაა.
-ემოციები? მოთოკოს!
არ დავინტერესდეთ რას გრძნობს და მითუმეტეს რატომ. რა აუციელებელია სენტიმენტები. დარჩნენ თავიან განცდებთან და იპოვონ გამოსავალი, გამოადგებათ ეს უნარი.
-შედარება აუცილებელია!
ყოველდღე შეახსენეთ რომ არსებობს ვიღაც “გიორგი” რომელიც კარგად სწავლობს, რომელიც არ თამაშობს ქაუნთერს, თავისი ინიციატივით კითხულობს. არ მოდუნდეთ, თანმიმდევრულობა ხომ მნიშვნელოვანია? უმეორეთ რომ ის არ გავს “გიორგის” რომ გიორგის ყველაფერი ექნება და ეს კიდევ დროს ფლანგავს. იმის თქმაც არ დაგავიწყდეთ რომ “მოვა დრო და იდაყვზე იკბენს”. არც ერთი “გიორგით” შემოიფარგლოთ, რაც მეტი იქნება მით უკეთესი.
-კრიტიკა?
ეს ალბათ მთავარი რგოლია, იცოდეს რომ არ არის სრულყოფილი, რომ არ მოდუნდეს იმისთვის, ცხადია.
არ გამოგრჩეთ არცერთი დეტალი, თმა, გემოვნება, ჩაცმის სტილი, ჭამის მანერა, ლაპარაკისაც ცხადია. სამეგობროზეც დაუფიქსირეთ თქვენი აზრი. განსაკუთრებით გაუკონტროლეთ მუსიკა რასაც უსმენს. ამ ასაკში ჩამოყალიბებულ გემოვნებას რა შეცვლის მერე?!
-არ ენდოთ!
არავითარ შემთხვევაში არ ენდოთ. მუდამ გადაამოწმეთ სადაა, ვისთანაა, შეგიძლიათ წაიკითხოთ მისი მიმოწერები, აქაც მთავარია რომ არ მოდუნდეთ და არ გამოგეპაროთ რაიმე. აგრძნობინეთ რომ ყველაფერი იცით და რომ ვერაფერს გამოგაპრებთ, ბოლო ბოლო თქვენც ხომ იყავით მის ასაკში? ესეც გაუმეორეთ ხშირად - ინტონაცია თქვენით შეარჩიეთ.
-მიღწევები.
მოსთხოვეთ პირველობა, სპორტში, ბალეტში და გალობაში ერთნაირად. რა მნიშვნელობა აქვს რა ეხერხება, ან რა უყვარს? მთავარია არ ჰქონდეს თავისუფალი დრო!
-ზრდილობა?
აიძულეთ ყველას მიესალმოს, გაუღიმოს, ფოტო გადაიღოს. ახლა თუ არ ისწავლა მერე დაგვიანდება. მერე რა რომ ერიდება გამარჯობის თქმა პირველს? გადალახოს!
-ასწავლეთ თქვენი დროის მნიშვნელობა.
დაე იცოდეს რომ თქვენ მისთვისთვის არ ხართ. დიდია უკვე. შეგიძლიათ უყუროთ ფილმს რომელიც არ აინტერესებს. სქროლოთ. ითამაშოთ. ტელეფონზე ილაპარაკოთ საათობით. პრინციპში ვერც შეამჩნევს ამას.
თუ ეცდებით, ყველაფერი გამოვა.
მთავარია ამოირჩიოთ რა გინდათ :)) თუ თქვენში იმედგაცრუებული, მოწყენილი ან გაბრაზებული თინეიჯერია აუცილებლად რქებით შეეჭიდებით ერთმანეთს. თუ ეცდებით რომ ამოიცნოთ თქვენი გაღიზიანების მიზეზი, ეძიოთ საკუთარ თავში გაღიზიანების წყარო, მარტივად დაალაგებთ ურთიერთობას და მაგარ მეგობარს შეიძენთ.
